Comezando coas solicitudes, xa lle tocaba ó Xohán_gz que, como non podía ser menos, escolle un grupo contundente e reivindicativo, de tendencia nacionalista, de crítica ácida e de linguaxe moi pouco recatada.

Temos omitido as cancións menos axeitadas para unha web didáctica, pero iso non quere dicir que non poidamos coñecer un grupo que chama ás cousas polo seu nome e que exemplifica algunhas das novas formas de creación musical en Galicia. Non obstante non esquezades a necesidade de manter o respecto, de escoitar, analizar e admitir todas as opinións, de adsumir a posibilidade de que outros pensen doutra maneira distinta da nosa e de facer sempre crítica construtiva aprendendo de todo e de todos.

Dios ke te crew (DKTC) é un colectivo de MC´S, DJ´S, graffiteiros e breakers formado na localidade de Ordes da fusión dos grupos 5Talegos e Ghamberros.

A primeira gravación acreditada de Dios Ke Te Crew foi o corte que incluíron na película colectiva Hai que botalos, recompilación de curtametraxes postas en circulación co gallo das eleccións ao Parlamento galego no 2005. Alí aportaban a banda sonora ao episodio titulado "O derradeiro", un tema que, como anécdota, chegou a pincharse ao remate da manifestación do día da Patria Galega que tivo lugar ese ano en Santiago de Compostela.

En 2006 chegou o seu primeiro disco Xénese. Comezando coa mesma introdución ca nos concertos. O primeiro LP de DKTC marca un fito na música en galego ó ser o primeiro disco de hip hop en idioma galego. Neste disco destacan temas como "Dios Ke Te Crew", "Herdeiros da dictadura", "Colleita´s Party", "Vas de Verde", "Profecía", ou o xa coñecido "Apagha a tele".

 

Ligazóns externas

• Web oficial de Dios ke te crew
• MySpace do grupo
• Análise da traxectoria do grupo